外號「五散人」嘅五名建制派功能組別議員，早前決定告別過往散修修嘅形象，喺嚟緊三年會期再行得埋啲，包括集中火力關注貧富問題，盡量對各項法案及動議達成一致投票立場，上個禮拜五佢哋就借施政報告致謝動議打響頭炮，集體倒戈支持泛民主派提出嘅對煲呔曾表示遺憾修訂案，為煲呔曾嘅管治敲響警號。
四項由泛民提出批評施政報告內容嘅修訂案當中，由白鴿黨黃成智提出、對煲呔曾完全漠視貧富懸殊加劇同貧窮人口激增問題表示遺憾嘅修訂，就有多達三十六張贊成同棄權票，投反對嘅僅得二十一人，但由於無法同時喺地區直選同功能組別分組取得過半數支持，先至技術上通過唔到，顯示大部分議員其實都非常不滿煲呔曾漠視窮人苦困。
泛民計盡都只得二十三名議員，多出嚟嗰十三人自然係嚟自建制派，其中五散人同匯賢智庫嘅葉劉淑儀都倒戈投贊成票，工聯會四子、勞聯李鳳英、旅遊界謝偉俊同專業會議梁美芬就投咗棄權票，如果計埋另一「反曾」建制派富貴黨嗰三票，煲呔曾嘅支持鐵票就只係剩番二十張，僅僅夠全體議員嘅三分之一。