本文重點
樓價愈升愈高，令好多基層甚至中產市民都買唔起樓，但財爺鬍鬚曾至今都只識齋噏出口術壓抑樓市，冇任何實質措施。行政會議成員張炳良同鄭耀棠早前就公開同政府唱反調，建議重建居屋同恢復定期賣地，視行會集體負責制於無物。僅次於鬍鬚曾嘅財金高官財經事務及庫務局局長陳家強，同埋嚟自建制派最大政黨嘅立法會議員李慧琼，近月更以實際行動對政府壓抑樓價投下不信任票，各自高追多一個市區物業作投資用途，明摑鬍鬚曾兩巴！
陳家強嘅政治手腕有幾高，從佢嘅花名「傻強」就略知一二，但佢嘅投資眼光就認真唔差。年前佢沽出一個澳門物業同買入一個灣仔區物業，最初畀人質疑佢低賣高買，事後證明香港嘅市區豪宅價格，反彈得仲快過澳門，話咁快已升番破海嘯前水平，一年過後肯定執唔少，唔怪之得早前佢誇口話金融海嘯已經結束啦！
最近煲呔曾都話港島區樓價太高，叫市民轉去新界買樓，鬍鬚曾日前更加證實香港部分豪宅嘅價格已超過九七年水平。但傻強同佢任職投資銀行高層嘅太太，就當「孖曾」嘅警告係耳邊風，喺九月初再次高位入市，買多咗個位於港島中西區嘅住宅單位連車位作出租用途。唔通佢哋認為港島區樓價仍係「高處未算高」，仲有水位走多兩轉至離場計數？
李慧琼掃第四個物業
至於本身係會計師嘅建仔議員李慧琼，之前已喺黃埔花園、傲雲峰同翔龍灣揸住三個物業，近月再喺九龍區買多個，不但係明摑鬍鬚曾一巴，亦同佢所屬政黨要求政府大力壓抑樓價嘅立場唔多協調。但佢強調嗰個物業係老公拍板買嘅，唔代表佢特別睇好後市。
李慧琼嘅黨友兼師傅立法會主席，最近亦告別租用咗多年嘅北角區住所，喺西貢區購入一個物業自住。大家都知佢就嚟拉埋天窗，估計今次入市係為咗實際需要，同點睇後市未必有關。