小白觀點：人肉標靶任掟唔嬲

警方奇謀妙計用「人肉路障」堵截非法賽車，拖足三個月都未賠，仲向苦主落地還錢，數口真係精。其實當局一向有用人肉執法，連警察自己做埋一份都唔知。你睇吓鏹水狂魔好忙咁喺深水埗同旺角兩區出動，警方採取拖延戰術，派出七、八十名警員守喺路中心，做人肉標靶任掟唔嬲。

警方呢招真絕，你估鏹魔唔想畀警察捉咩，只不過次次掟完後，等嚟等去都唔見警察上樓，甚至連食環署嘅亂掉垃圾告票都冇張，咁冇挑戰性，掟得多都厭啦。如果有日大家行行吓街突然天降嘔吐物，唔好覺得驚奇喎，係呀，因為鏹魔已經等人拉等到悶到嘔囉，拎去驗DNA，鏹魔無所遁形啦。

網友觀點......

怪醫秦博士

拖得就拖吖嘛，三個月啫，佢哋覺得冇咩問題，我哋啲小市民，有佢符咩？

Meko

人哋嗰晚已冇覺好瞓，生意冇得做，車又散埋，依家仲拖人哋數，特衰政府真係冇改錯名。

jason

差嗰少少錢，你咪賠畀人囉，仲討價還價真係冇風度呀，人哋都要開飯o架！

德素

人哋仲要借錢整車，等政府賠等死人，十萬火急，有咩冬瓜豆腐倫常血案，你話政府點孭？

網址：www.sunsiupak.blogspot.com

阿豪觀點：未計司機精神損失

買餸講價就聽得多，估唔到警方執法失當賠償畀市民都有價講。大家都記得早前「人肉路障」單嘢啦，有的士司機原本要求警方賠一更收入即六百蚊，點知警方都要「落地還錢」還價四百五。吓？咁都得？

喂，人哋喺高速公路揸揸吓車無啦啦畀你叫落車，嚇都嚇餐懵啦，呢方面嘅精神損失究竟有冇得賠都仲有排拗，家陣只係講緊幾百蚊啫，都要咁斤斤計較？

都唔明警方點得出四百五十蚊呢個數，或者佢哋認為事發時的士司機已經開咗一陣工，要計番比例啩。照咁計，旺角、深水埗接二連三發生鏹水彈案警方都束手無策，係咪都要考慮七五折支薪呢可？

網友觀點......

風之子

嘩，班警察份糧七折出，你估又得唔得吖嗱？

匿名

小小賠償都要講價，有冇搞錯？請副局長就大花筒，賠償畀小市民就打七折！

jojoey

警察賠償都可以壓價到七折？又唔見佢收市民罰款嘅時候打七折？即係有佢講，冇人講！

湯漢斯

警方可能會話：嗱，呢啲都係公帑，我都係幫納稅人慳錢o架咋！

網址：www.lukchiho.blogspot.com