點樣令樓市降溫，健康發展，各界意見紛紜，莫衷一是。至弊連行政會議成員都不甘寂寞，七嘴八舌，亂噏廿四，張炳良前幾日開聲話，政府應該考慮復建居屋，話口未完，又到鄭耀棠出嚟攞彩，佢唔止話要復建居屋，仲話政府應該恢復定期賣地添。

叮！請問鄭耀棠知唔知自己乜嘢身份㗎？行政會議等同政府內閣，有集體負責制同保密制，復建居屋又好，定期賣地又好，都關乎整體房屋政策，茲事體大，點可以好似賣山草藥咁，噏得就噏？何況最近當局不斷強調唔考慮復建居屋，亦冇話要恢復定期賣地，發展局局長林鄭月娥都不過話會「優化土地供應」，鄭耀棠公開同政府唱反調，即係擺明添煩添亂啫，萬一佢嘅言論引起樓市混亂，令到市場動盪，呢隻鑊佢孭唔孭得起先？

內閣成員籠裏雞作反，公開唱反調倒政府米，呢啲情況喺港英年代根本冇可能發生，反而回歸後屢見不鮮，如果話特區政府唔係弱勢，細路仔都唔信喇。

最弊係依家市場訊息已經混亂不堪，佢哋仲無端端加多把口，搞到亂上加亂。正如前行政會議成員田北俊話齋，集體負責制已經名存實亡，持反對意見嘅行會成員，應該辭職至啱。

查實違反行會集體負責制，鄭耀棠唔係第一次啦。早排有公務員團體抗議減薪嘈到拆天，仲話要上街遊行。佢就走出嚟話，自己作為工會領袖，唔贊成公僕包括高級公務員減薪。

叮！減薪方案係由行政會議拍板嘅，鄭耀棠自己都有份參與，唔通佢咁快就唔記得？佢當集體負責制冇到，企喺政府對立面，其實捍衞市民權益係假，爭取政治本錢就真！

話時話，行會成員同政府唱反調嘅，又點止張炳良同鄭耀棠兩個吖，連行會召集人梁振英都作反喇，佢舊年咪一樣高調狂踩工資保障運動係失敗之作，令政府落唔到台。

叮佢個鎯鎯！行會內訌玩「香港亂噏」，集體負責制變咗集體亂噏制，行會成員連基本政治倫理都冇，基本規章制度都唔遵守，香港有乜辦法唔亂吖。再係咁落去，呢個政府遲早由「跛腳鴨」變成「無腳鴨」咯。