港府銳意發展教育產業，本地學界意見紛紜，城市大學校長郭位卻另闢蹊踁，決定反其道而行，去內地發展教育產業。佢尋日透露，年前已經同中國科技大學合作，喺蘇州工業園推出碩士同博士生課程，稍後又會喺上海設立辦事處。似乎北上開拓教育產業更有前途噃！
城大上海設辦事處
郭校長話，佢哋同中國科技大學嘅合作早就開始，除咗推出課程外，亦可以吸納內地學生嚟香港讀書，同時城大嘅發展空間都大啲；至於喺上海設立辦事處，佢就話並唔係為咗招生方便。喺長三角嘅龍頭城市設立辦事處，斷估唔係淨係為咗宣傳啩？套用內地領導人成日講嘅一句話，唔通呢啲就叫做「悶聲發大財」﹖
