本港醫學界近日好熱鬧，西醫工會原本部署喺呢個月十二號發動全港屋邨醫生罷診半日，抗議領匯瘋狂加租牟取暴利，點知淪為醫學界兩大組織過招嘅舞台。醫學會尋日高調出新聞稿，呼籲同業唔好罷診，仲唔點名批評發動罷診行動嘅西醫工會，話有個別人士為個人利益將病人健康當作談判籌碼，好唔道德。
西醫工會梗係唔示弱啦，反指醫學會甘願接受領匯嘅「不平等條約」，任由同業被剝削。點解醫學界鬼打鬼呢﹖醫學會會長謝鴻興同西醫工會嘅楊超發都係兒科醫生，楊超發駁火時大翻謝鴻興舊賬，話○七年非合約制公立醫生爭取同工同酬罷工靜坐行動，謝鴻興都有參加啦，仲質疑今次抗爭同當年嘅行動邊個私利重啲？又指謝鴻興突然狙擊罷診行動，只係想喺對抗領匯加租一事攬功。
謝鴻興就批評，醫生罷診會影響專業形象，而業內有個別人士為咗個人利益，搵病人嘅健康做籌碼，除咗唔道德，罷診醫生仲可能被病人向醫務委員會投訴違反專業守則，請各位醫生三思咁話。醫學會同西醫工會打對台，已經唔係第一次，對上一次喺選舉中對抗，結果兩敗俱傷，今次又點？大家拭目以待啦。