退出政府之後，前經濟發展及勞工局局長葉澍堃（Stephen）就變身食家，早排仲幫電視台拍飲食節目，去法國試酒，太太、細仔Ian同佢女朋友Cindy都有同行，兩個禮拜嘅行程參觀咗波爾多、勃根地、香檳同阿爾薩斯四個法國產酒區，見多識廣嘅Stephen都話不枉此行兼回味無窮。
佢哋出發時正值夏天最尾嗰兩個禮拜，冷暖適中，日照時間又啱啱好，睇靚景、品靚酒之餘，佢哋仲有機會落田摘新鮮葡萄試食，不過，Stephen都話有啲辛苦：「阿爾薩斯就喺德國旁邊，路程都幾遠，要一早起身坐成七、八個鐘頭車過去，都有少少辛苦，不過就好享受。」
佢跟住大講甜酒中最名貴嘅Chateau d'Yquem釀製法，原來呢隻名酒係用一種畀貴族霉菌侵襲過嘅葡萄釀製，呢種霉菌會令葡萄變到葡萄乾咁，加上種稙要近河，仲要早上有霧配合至得，莊主話好有信心今年釀嘅酒足以媲美一九四七年嘅佳釀喎。
Chateau d'Yquem喺甜酒界享負盛名，被推崇為液體黃金，只有受過名為「貴腐菌」或「貴族霉」入侵過嘅葡萄先能夠成為釀製嘅材料，一九九二年就曾經因為冇合格嘅葡萄而乾脆唔釀酒，難怪被喻為係世上最佳嘅甜酒。