本文重點
周末賣旗活動係香港人生活嘅一部分，好少引起哄動，不過，尋日全國政協委員汪明荃同老公羅家英為樂群社會服務處賣旗，就搞到條街水洩不通。其實，佢哋都未正式行出大街，已經畀班街坊密密麻麻圍到實，有啲仲捐成百蚊買旗添，出動明星賣旗，籌款真係話都冇咁易！
李宗德食檸檬獲啟發
汪阿姐話佢細細個已經同籌款好有淵源，以前讀小學時成日參加學校嘅賣旗日，仲會同同學仔比賽，係咁喺北角嘅大街小巷度「兜生意」，務求幫慈善機構搵到最多善款。尋日見佢同家英哥賣旗都好拿手，只係不時要兼顧啲市民嘅相機啫。
尋日有份幫手賣旗嘅仲有和富社會企業會長李宗德，佢話以前喺街邊做籌款活動，都試過畀人請食檸檬，不過呢種失敗嘅經驗，令佢體會到做慈善事業一定要好多人不停努力咁延續落去。可能都係因為咁，佢先會創立和富社企，落力幫助有需要嘅人。