港府高官各有所好，一班女政務官多年前組成「書法派」，拜咗知名書法家高雲州為師學寫書法，佢哋包括運輸及房屋局局長鄭汝樺（Eva）、商務及經濟發展局局長劉吳惠蘭同民政事務局常秘尤曾家麗等。不過，Eva尋日自爆最近兩個月太忙，已經走咗兩個月堂，計落佢成八、九堂都冇返學，睇怕屋企支毛筆同文房四寶都封晒塵囉。
Eva尋日出席一個公開活動時話近期太忙，成日都返唔到學，或者因為近期城中大事都同佢個局有關，一邊反高鐵，另一邊又要復建居屋，搞到佢撲完呢邊火，又要顧另一檔，仲邊顧得修心養性嘅書法呢？佢仲爆響口話其他「書法派」高官都因為太忙，好耐冇去上堂喎，唔知遲吓呢個「書法派」會唔會散檔呢？
教開佢哋嘅高師傅舊年不幸中咗風，一班弟子已經搵咗個代課老師嚟教，可惜佢哋個個都好忙碌，返唔到學啫。不過Eva都話，有時間就會喺屋企練吓字，只係冇師傅督促，成個人懶散咗好多，一個禮拜都寫唔到幾隻字喎！
咁下一次嘅女高官書法展幾時舉行呢？Eva一聽個「展」字就耍手擰頭，話搞一個書法展實在有太多濕碎嘢要做，上年搞過一次都怕怕。