吳校長喺浸大做咗二十幾年，又做過校長，所謂當家先知米貴，所以一講起私立大學，佢嘅態度都好有保留。佢話，家吓本地八間大學全部獲得政府資助，所以能夠運作落去，但私立大學只靠營辦者資金，要維持一間大學的運作實在係好大嘅挑戰。

佢跟住大講培訓一個大學生嘅成本，話家吓一個普通大學生嘅培訓成本係每年十八至二十萬元，如果係醫科生更加要成五十萬咁多，私立大學只靠學費點維持呀？目前本港大學學費普遍係每年五萬幾蚊，即係話政府每年津貼每名大學生嘅款額高達十五萬左右，㩒吓計數機真係幾嚇人噃。

請唔起好教授 師資堪虞

吳校長唔睇好，做過語常會主席嘅田北辰亦大潑冷水。田二少日前講到私立大學時話香港教育制度一向死估估，政府提倡搞教育產業都算係有目標，不過，私立大學最緊要講質素，即係大學要有公信力，但家吓全球大學爭人才，好嘅教授好難請，而大學如果唔能夠保證師資，質素就會受影響。

所以田二少話擔心啲私立大學最終會變成外國啲野雞大學咁，將貨就價，只能訓練出一啲唔達標嘅「人才」，最後連商界都唔認可，咁樣嘅大學有乜用呢？