小白觀點 腦殘一族神遊太虛

社署亂咁批津貼，畀某啲存心呃錢嘅人隨時可以拎錢買番副GUCCI眼鏡，一早已經唔係新聞。申訴專員公署日前又搵社署開刀，主動調查六宗個案，狂數九宗罪，有傷殘津貼個案申請人冇咗左手手指，竟然被誤寫為右手傷殘，社署職員照批可也！

咁大個人左右都唔識分？係咪聽得哥哥首《左右手》多，搞到「從那天起我不辨別前後，從那天起我竟調亂左右」？攣直分唔到唔死得人，但左右都搞唔清，病情真係可大可小㗎！唔使醫生證明，都知成班社署員工係腦殘一族，日日喺辦公室神遊太虛，不如亂批啲津貼出嚟，等小白老弟幫佢哋著書立說，寫本《腦殘遊記》好唔好？

網友觀點...X）...

[　納稅黨　]社署應批唔批，唔應批又亂咁批，多多公帑都唔夠佢哋Fing呀！

[　gigi　]明白晒，原來慳慳埋埋長者啲生果金，就係要嚟亂咁派。

[　黃金俠　]香港嘅社會福利有等於冇，有需要嘅人等到死都未有，存心呃錢嘅人就手到拿來，都唔知乜嘢世界！

[　許三多　]聽聞好多長者等老人院，等到死都未有，聽聞殘疾宿位要等九年，唉！唔怪之得有名你叫「特衰政府」啦。

網址：www.sunsiupak.blogspot.com

阿豪觀點 上唔到鹹網大件事

呢個社署認真混帳！申訴專員公署調查發現，社署喺審批傷殘津貼過程中甩甩漏漏，試過有個申領傷津人士，多年嚟失去左手所有手指申領傷津，但係醫生寫錯佢冇咗右手手指，社署竟然照批可也，其後又無端端唔批。

其實社署審批傷津個標準根本就好有問題，原來淨係鋸咗一條小腿，係可以唔獲批傷津嘅。咦？冇咗手指可以攞傷津，冇咗腳點解唔可以攞呢？唔通坐喺冷氣房嗰啲官以己度人，以為冇咗隻腳好小事，可以照常返工，但係冇咗手指，返工期間上鹹網會好唔方便，所以至咁批法？

唉！咁搞法，社會可以少好多傷殘人士，因為好多畀社署玩都玩死啦！

網友觀點...X）...

[　卜迭　]傷殘人士有津貼，咁社署腦殘又有冇津貼呢？唔怪之得班官咁高人工啦……

[　豪哥　]政府唔覺唔覺都亂咁批津貼畀地產商啦，慣晒啦。

[　匿名　]又一次顯示社署制度僵化，一啲人情味都冇……

[　joey　]唔怪得香港係貧富懸殊最嚴重嘅地區啦，多得政府唔少，由得啲地產商狂加樓價，但啲窮人連拎千零蚊綜援都好難。

網址：www.lukchiho.blogspot.com