「喂，政府熱線，我呢度有棵樹遮住交通燈啊！麻煩你搵人執執啊！」「好啊，我哋即刻派人嚟修剪啊。」結果，剪樹同事到場一看：「唉，樹係無辜嘅，呢個係燈嘅過失。」至於有否做出剪燈就樹的創舉，成為一個謎。

「喂，政府熱線，我呢度係香港仔魚市場啊，條行人路好多手推車啊！阻住晒，行唔過啊！麻煩你搵人嚟跟跟啊！」「咦，咪住，啲手推車入到市場未啊？入咗就歸食環署管，未入就歸路政署管喎。」「啤！」

夠離奇吧？夠谷氣吧？上述情景無花無假，全部發生於1823政府熱線，事關個個公僕做又三十六，唔做又三十六，結果不同部門推莊成風，任何離奇谷氣事都可能發生。小生奉勸大家，將來發生緊急事項千祈唔好打錯1823，否則可能遇上以下情形：「喂，政府熱線，我呢度係街市門口啊，有架電油車撞運魚車啊！成地電油成地魚啊！」「啲電油倒喺街市內定街市外呢？街市內歸食環署管，街市外歸路政署管喎。」「頂，有咩分別呀？嘩嘩嘩，啲魚跳上架車，燒着咗呀，快啲搵消防嚟啦！」結果消防到場，架車燒剩棚骨：「火係無辜嘅，呢個係魚嘅過失，我哋會查清楚到底由漁護署、食環署定消防處負責，大概三個月啦。」