活在香港，對住咁光怪陸離嘅世情，唔癲都變傻！聯合國開發組織一份報告指出，以零代表完全均富、一百代表貧富極端懸殊的堅尼指數去量度，香港的指數達到四十三點四；新加坡緊隨其後，排名第二。嘻！香港終於有樣嘢叻過新加坡啦！

筆者為「日清即食麵」一族，即餐搵餐食餐餐清，每到「稅月催人」時必落髮如落英，拂了一身還滿！是以筆者對在職貧窮者特別感同身受。佢哋肯做肯捱，唔攞綜援；然而，即使有工作，收入亦不足以應付日常所需。

低下階層從事的工作，多為短暫性，通常以日薪或時薪計，收入難言穩定；他們即使傍晚才去街市執平餸，也是捉襟見肘。這些自力更生的在職貧窮人士，政府沒義務幫上一把嗎？新一份施政報告對貧窮問題視而不見，敢問煲呔曾「群策」創了甚麼「新天」？

香港再多的優勢，都要栽在庸官的手裏，加上領導層包容疏忽，剛愎自用。古人說：栽下梧桐樹，引來金鳳凰；特區政府卻是：栽下擴大問責制，引來民怨怒火潮！百姓愈怨憤，領導愈亢奮！一斤唔夠，斬多二両！