諗唔到咁荒謬嘅事，居然發生喺自吹「國際都會」、「魅力之都」嘅香港，而更荒謬嘅係，趕客嘅竟然係負責赤鱲角機場運作嘅機場管理局。

機管局以防止的士電召服務畀人濫用為由，月初推出新措施，規定去機場接載電召乘客嘅新界綠的司機，至少要提早兩粒鐘致電機管局登記，而且冇得更改同取消，仲要一粒鐘內離開，如果唔係，乘客唔准上車，司機見財化水不特止，分分鐘要揸架空車走人，連油都蝕埋。

咁白癡嘅規定，一睇就知唔掂啦，結果不出所料，啱啱實施就撞晒大板。有位由上海返港嘅乘客李生，因為航班延誤大半個鐘，加上要等行李，遲咗個幾鐘至去到的士預約區。機管局職員竟然唔准佢登上事先預約好嘅的士，仲要佢離開，點解釋都冇用。李生最後打算報警，對方至行使「酌情權」畀佢上車。亦有乘客因為航班早到，被職員以「未夠鐘」為由，阻止佢坐上預約好嘅的士。

叮！機管局認真巴閉，機場都未管得掂，依家連乘客搭的士都要管埋。航空交通繁忙，航班誤點嘅情況幾乎日日都有發生，早幾日美國仲有架民航客機「飛站」添，航班早到或遲到都唔准乘客搭預約好嘅的士，簡直豈有此理！

新措施唔理三七二十一，硬性規定的士等候同上客時間，唔單止令司機無所適從，更加係攞乘客嚟搞，無情白事添煩添亂，令佢哋失晒預算。正如苦主李生話齋，去過咁多地方，只有香港機場至有咁唔合理嘅規定，機管局咁搞分明係趕客啫。再講，乘客約好車都冇得坐，一定會據理力爭，機場係出入香港嘅大門，旅客抵埠第一眼見到嘅，居然係周街有人嗌交，香港乜架都丟晒啦。

新措施撞晒大板之後，機管局至運用「酌情權」，根本係治標唔治本。正如新界的士業人士話齋，機管局應該盡快檢討機場內部嘅溝通，就預約服務同航班點樣配合，重新規劃，制訂合乎客觀實際嘅措施。

來自鄰近地區嘅競爭愈來愈激烈，本港旅遊業已經好似王小二過年咁，一年不如一年。機管局咁搞法，即係自己倒米，對旅遊業踩多一腳，你話幾戇居吖！

唔該機管局班老爺快啲帶番個腦開工，多啲聽吓的士業界嘅訴求，了解實際情況，唔好再閉門造車，添煩添亂啦。叮！