小白觀點：益盡自己友又咬佢食咩
好多人一廂情願以為慳電膽益親家呢役一定將曾蔭權打殘，佢吹住口哨拍拍屁股放假去遊埠，真係睬你都傻。你鬧佢益自己友咩？好！就拉多兩個自己友入局有福同享，你又咬佢食咩？
不過，輿論成日插佢唔曉主動申報，確係幾唔公道，燈膽權老早已經向司局長申報弟婦係雷曼苦主，仲想點呀？大家可能唔知乜嘢叫強政勵治，唔好以為搞好經濟，低下階層唔使去食物銀行就算呀。
所謂多難興邦，一個有遠見嘅政治家罵名多多益善，少少無拘。如果六十年後有個女學者走訪經歷特區苦難管治嘅幸存者，寫本叫《大煲大鑊二○○九》嘅書，呢啲咪叫做名留青史囉。
網址：www.sunsiupak.blogspot.com
阿豪觀點：全港市民抽獎做副局長
特區政府再委任兩個副局長，兩個都係嚟自公務員行列。咦，乜當初設立副局政助嘅時候，唔係話要吸納更多政治人才嘅咩？
不過，大家都無謂太過認真囉，煲呔曾夠話「以民為本」、「急市民所急」啦，結果大家都見到啦，話佢「急親人所急」都仲可能貼切啲。所以話，都係唔好對呢班副局政助有太大期望啦！同大家做個測試呀，你試吓一口氣講出五個副局長個名出來吖嗱，邊位讀者老爺咁把炮真係噏得出嘅話，豪伯即刻請佢食餐飯又點話？
反正大家都唔知班副局長係乜水、做啲乜㗎啦，不如當紓困措施咁做，全港市民都可以參加抽獎，幸運兒就係副局長一年合約。
網址：www.lukchiho.blogspot.com
網友觀點......
沉下了的落花
加多兩件同一個level嘅垃圾？真係癡癡呆呆，坐埋一台！
Eric
民意一於少理，好嘢梗係要益自己人啦，權權你好嘢！
JUN
依家好似愈爆愈多嘢，仲要幫弟婦出頭添，BT曾呢鋪水洗都唔清啦！
打工仔
做副局長有成二十萬一個月，有冇搞錯呀，人哋請文員，要識三語做足六日，都係得四千蚊咋！
醫神
煲呔組建「曾家軍」唔係咩新聞啦！佢今日廣植勢力，他日無論邊個揸Fit都係佢門生，幾過癮呀！
伊藤開司
其實副局長人選愈嚟愈窄，你諗吓成個政府民望咁低迷，真正有料之人都唔想拍埋去影衰自己啦！
石人
冇聽過香港公務員係全球效率最高嘅團隊咩？你睇佢哋爭取加薪就知啦，所以絕對係理想人選。
匿名
之前開副局長都係咁畀人鬧啦，仲開？係咪博大家轉移視線，會唔記得慳電膽事件呀？