菁英會主席施榮忻Jaime係大忙人，但對囡囡Victoria就「廿四孝」之極，尋日，囡囡讀嗰間跑馬地聖保祿小學舉行籌款日，Jaime就一早起身同囡囡一齊去賣旗，幫耆英會嘅長者籌款，兩父女仲由銅鑼灣行到落灣仔添，一於寓慈善於親子樂。
賣旗嘅時候，囡囡表現得幾怕醜，有時唔敢出聲，要爸爸幫手，呢對父女檔亦好合拍，Victoria負責幫人貼支旗，爸爸負責拎旗袋，一朝成功咁賣咗兩大版旗。
Jaime同太太分開咗，家吓係自由身，亦係一個單親爸爸，好多有經濟能力嘅父母鍾意將仔女送去國際學校讀書，但Jaime就幫囡囡報咗傳統名校，呢排佢好忙，冇時間幫囡囡溫書做功課，搞到囡囡成績都退步咗，雖然保持到七十分左右嘅水平，但為咗幫Victoria打好基礎，佢已經請定補習老師。