各大政黨近年都積極開拓地區勢力，穩固地盤，鄉議局尋日都搞咗個大龍鳳，由副主席、立法會議員張學明到大埔富善邨開設議員辦事處，呢個辦事處亦有為新人黃元生參加下屆區選抬轎嘅目的，張學明致詞時，更不經意披露發叔有意交棒，至於邊個接，聽嘅人就要自己領悟啦。
張學明致詞時話：「作為我自己，已經五十到尾，六十出頭，我哋呢代人要講承先啟後，承先係劉皇發前輩過去取得嘅成果，要好好將個波接過來，然後發揚光大，啟後就係培育後人……」
講番佢個辦事處開幕禮，請來鄉議局主席劉皇發及發展局局長林鄭月娥撐場，而且派頭十足，切咗六隻燒豬。佢哋喺富善邨開檔，有意挑戰白鴿黨兩名區議員，過去嘅兩屆區議會選舉中，建制派都有派人參選卻敗北，今次張學明帶新人突圍，似乎係想打破屢攻不破嘅宿命。