自從爆出慳電膽現金券醜聞後，唔少人都將單嘢同前財政司司長梁錦松偷步買車件事相提並論，久未露面嘅阿松尋日被問到對件事有乜睇法？阿松話自己成日唔喺香港，對件事唔了解而拒絕評論，佢仲話自己「不在其位，不謀其事」。
阿松尋日應香港大學畢業同學會教育基金邀請，出席一個有關發展香港成為教育樞紐嘅圓桌會議，佢一出場就好幽默咁介紹自己係一個「二五仔」，佢話自從做咗百仕通集團嘅大中華區主席兼高級董事總經理之後，成日都要返大陸處理業務，逢星期「二」飛出香港，星期「五」先飛返入嚟，想唔做二五仔都唔得啦。
做二五仔都未夠，阿松仲話自己係「三少」，唔係少爺個少，而係多少嘅少，佢話自己少理論、少參與教育事務同少喺香港，以此做開場白，梗係惹嚟唔少會心微笑啦。