本文重點
近排官府多事，偏偏煲呔曾丟低個爛攤子走去東洋避風頭，搞到政務司司長唐英年尋日要代佢解畫，一向口齒唔多伶俐嘅唐唐尋日唔知係咪心中有鬼，代煲呔曾澄清弟婦搶閘獲得賠償嗰陣，「新聞稿」三個字都要講三次先出到口，短短幾個答問又口窒窒，到底佢係唔想講，定係唔識講？或者費事開口夾着脷爆大鑊？
無厘頭搞爛gag
唐唐尋日落區出席一個活動，事後被追問煲呔曾弟婦早於今年四月獲得雷曼產品嘅回購賠償一事，佢雖然滿面帶笑，但講嘢就騰騰震：「行政長官其實就……都已經發表咗一個新聞……新聞……新聞稿啦！」連講三次先出到口，表情又好唔自然，惟有乾笑搭夠。
佢尋日原本係去荃灣參加一個名為「荃城嘩鬼藝術日」嘅活動，仲參觀一幅創意地畫添，個地畫喺地上畫咗個窿，唐唐致詞時話起初以為好危險，待睇真啲先知個窿只係一幅畫，但佢都提醒大家，第日見到地上有個大窿都係要小心為上。
唐唐呢個爛gag真係唔多好笑，諗吓都知商場地下邊度會有咁大個窿？但佢又話畀人呃、又話見窿要小心，睇怕佢唔單止要練吓講嘢，仲要練吓眼力至得嘞！