本文重點
保安局局長李少光尋日同一眾紀律部隊阿頭齊齊喺慈善籌款活動亮相，場中仲有內地公安部原常務副部長、中國警察協會理事主席田期玉，光哥鎮守保安局多年，而佢喺入境處處長任上已經同田期玉有交往，今次為慈善敍舊真係幾特別。
慈善跑籌逾120萬
聽講，田期玉做咗「中華健康快車」基金會副理事，所以幫內地偏遠地區居民免費做手術治盲嘅「健康快車」流動眼科火車醫院喺香港籌款，佢咪搵埋一班老友記撐場囉。或者係咁，當日到場嘅紀律部隊阿頭有海關關長湯顯明、入境處處長白韞六、消防處處長盧振雄、懲教署署長郭亮明等，連廣東省政協副主席兼省公安廳原廳長梁國聚都係座上客。
呢個活動係慈善跑，共有一千五百人參加，為健康快車籌得超過一百二十萬元，光哥同咁多位紀律部隊阿頭就用差唔多四十分鐘行完整個慈善步行。