公開大學校長梁智仁太太梁許安璞Annie係出名嘅入廚能手，仲喺○七年初出咗本烹飪書《安璞滋味》，梁校長前晚喺山頂家中宴請一班舊同事敍舊，要勞煩Annie預備八人餸菜，呢個賢內助接令後，諗掂張菜單就去街市入貨，八人美食真係話都冇咁易。
Annie買咗隻「皇健雞」，佢話最好味嘅雞係黃油雞，好香雞味，但缺點係多油多膽固醇，食落冇咁健康，「皇健雞」相對健康啲，食得多都唔怕。跟住佢又去到海鮮舖揀咗澳門奄仔蟹，即係膏蟹同肉蟹嘅幼年處女蟹，約三個幾月大，貪啲膏同肉夠晒嫩口。
主菜之後，佢又買咗啲新鮮蔬菜同士多啤梨等生果，然後去太古廣場地庫間「Great」買空運到港嘅新鮮無花果同冧酒，埋單一千七百元左右，加埋部分之前買落嘅餸，經佢妙手炮製就可以整到：頭盤包括醃羊仔骨、巴哈馬火腿Pizza及金必多湯；主菜就有西式秘製焗奄仔蟹、燒焗釀八寶乳豬；至於甜品就係「Rumbaba」。