煲呔曾忽然休假，聽聞話佢想同家人出外抖一抖喎！金秋十月去日本賞紅葉，睇怕佢又會揸住相機周圍影，只係佢風花雪月嘅時候，港府上下就要為佢遮醜嘞。

結婚40周年補鑊

有消息話，上周日煲呔曾一班好友喺馬會設宴祝賀佢結婚四十周年紀念，身為主角嘅佢因為醜聞纏身而無顏面出席，但甩底變露底，佢班「曾朋友」因而曝晒光啦。

被迫臨時放飛機嘅煲呔曾，轉過頭走去北海道避風頭，順便又補番慶祝，最低限度去到日本唔使聽到「慳電膽益親家」呢六個字。自從施政報告發表後，煲呔曾即面對內憂外患，首先被揭發藉推慳電膽現金券明益親家風波，廉署介入調查未果，但日前又被踢爆佢弟婦透過「曾朋友」、立法會議員石禮謙協助下獲得銀行提早回購雷曼迷債賠償，再度涉嫌利益衝突，事件仍在發展階段，未知點收科。

近期豪宅創天價，中產大呻置業困難，煲呔曾卻以「何不食肉糜」嘅口氣叫人揀偏遠地區嘅平價樓，惹來猛烈抨擊，就連佢嘅「內閣親信」、行政會議成員張炳良都唱反調，倡議復建居屋，變相摑咗佢兩巴。煲呔曾一身蟻咁避走北海道，根本冇辦法解決問題，不如快啲返香港認衰、收拾殘局好過啦！