身為天價豪宅受「億」人，吃了滿嘴葡萄的大業主當然不甘示弱，還以顏色回應道：「天價係真，或者再貴啲都買，你吹脹佢咩！」

的而且確，吹佢唔脹，一如豪宅的樓層編排極之獨特，同樣無人奈得之何。八十八樓下面一層是六十八樓，三十九樓上面一層是六十樓，每次搭上落應該都是一趟奇幻旅程。

近日，吹佢唔脹事件何其多。

事件一：曾蔭權涉嫌利用慳電膽現金券益親家，連日受盡炮轟，連親家老爺也發表聲明反駁了，主角是不是應該清楚交代一下呀？不交代就是不交代，玩龜縮就是玩龜縮，你吹脹佢咩！

事件二：廣深港高速鐵路拍板興建，短短二十六公里路程盛惠六百五十二億公帑，平均每公里造價二十五億，大有機會又為香港帶來另一項世界紀錄，起鐵路有沒有必要出動貴到嚇死阿媽的天價呀？天價係真，或者再貴啲都起，你吹脹佢咩！

事件三：人人減薪，處處裁員，施政報告又拒絕派糖，公務員不但獨善其身，竟然還可以變相加薪，算不算大細超呀？親疏當然有別，你吹脹佢咩！

事件五……咦，事件三之後不是應該輪到事件四嗎？豪宅教的，逢四必刪，你吹得我脹咩！