平機會主席鄧爾邦被審計署踢爆未經政府批准，用公帑為自己購買保額高達七百幾萬嘅超豪人壽保險。立法會政府帳目委員會早排對事件表示「極度遺憾」，市民都希望政府揸正嚟做，對損公肥私行為當頭棒喝，煞住歪風，但結果令佢哋完全失望。

政務司司長唐英年尋日回應帳委會報告，提到鄧爾邦買保險嘅醜聞，居然好似冇事發生咁，話政府已接納平機會管治委員會建議，容許主席購買額外人壽保險，仲追溯批准歷任主席都可以享受呢項福利。同樣離譜嘅係，喺唐唐口中，呢啲自把自為、明目張膽攞納稅人着數嘅行為，不過係「行政疏忽」咋。

咁都得！係咁意補番吓手續就乜事都冇，濫用職權唔使懲罰，將化公為私行為合理化不特止，仲賣埋大包，前朝同現任齊齊Happy，人人有份，永不落空。咁咪等於變相鼓勵啲蛀米大蟲「再接再厲」，繼續搵納稅人笨？係咁，使唔使頒番個乜鬼「星章」畀鄧爾邦添吖？

叮！係人都知，平機會一向洗腳唔抹腳，鄧爾邦當正自己係山寨王，為所欲為，正經嘢唔做，成日周圍飛，免費遊埠做「離岸主席」。佢至叻係有便宜唔執輸，除咗未經批准幫自己買巨額保險外，出差仲博大懵將經濟客位升級做商務客位；住酒店嫌普通客房唔夠豪，要住「大使套房」。鄧爾邦啲醜聞十隻手指數唔晒，尸位素餐，早就應該叮走啦。正如有立法會議員話齋，港府唔糾正錯誤，仲漠視帳委會嘅批評，簡直係荒謬。

有樣嘢仲荒謬，港府唔知係咪嫌平機會唔夠大花筒，除咗主席外，仲要加多個營運總裁，話監察平機會運作喎。但係，鄧爾邦啲衰嘢街知巷聞，港府唔止包庇縱容，仲諗計幫佢埋單。大拿拿個個月攞廿萬請個人返嚟，叫佢監察啲乜吖？互相制衡就冇嘞，互相扯貓尾就真，到時咪盞多隻香爐多隻鬼。

叮！講開又講，香港乜都唔多，好似平機會、私隱專員公署咁嘅公營機構就最多，呢啲機構無所事事，正經嘢做唔到，但管理層損公肥私嘅醜聞就特別多。至弊審計署一年至多審得嗰三幾個，全部公營機構審一輪要成二十年，審得嚟，多多公帑都唔夠佢哋Fing啦。

計太一叮話齋，臭罌出臭草，平機會呢啲政治花瓶多個唔多，少個唔少，愈多只會愈亂，早就應該送晒去堆填區啦。港府情有獨鍾，居然當佢哋係寶，唔通呢啲就叫臭味相投？叮！