華仁重建，一班星級校友瞓身幫忙，佢哋組成嘅華仁戲劇社，今、明兩晚喺演藝學院有好戲上演，尋晚醫院管理局主席胡定旭扮演嘅丞相、立法會議員梁家傑扮演嘅越官同合和主席「哥頓」胡應湘夫人胡郭秀萍扮演嘅公主着晒古裝綵排，佢哋人人四眼，講嘢又諧趣，真似係鬥搞笑多過唱大戲。
今次第四次粉墨登場嘅肥胡，廿幾卅年前仲係中五仔，當時第一次踏台板做小太監，時至今日佢「升官晉爵」做丞相，向來幽默嘅佢三句不離本行︰「依家醫學昌明，做完太監返出嚟可以做丞相。」佢尋日匆匆趕到後台，趁換衫空檔先得閒坐低扒幾啖大會供應嘅叉燒飯盒，為母校捱飯盒真係唔話得。
另一個大忙人馬會主席阿John陳祖澤就做皇帝，佢戴完王冠又要黏鬚，喺後台轉嚟轉去；扮公主嘅哥頓太就猛話緊張，不過佢練擲水袖都練咗半年，相當勤力。袋巾傑戴住官帽上台，頂帽竟然向後褪，露咗個頭箍出嚟，搞到對手想笑又要忍住，靠害咩！