特區政府口講強勢，實際仲弱過藥煲，近期每遇反對聲音，就只識掟銀彈解決，好似掟二十億元推動高鐵工程，不惜將菜園村嘅農地由丙區提升至補償額最高嘅甲區計算；而紀律部隊爭相鬧事，行政會議又變軟腳蟹，令八成紀律部隊人員即時變相加薪，「揸槍」嘅要求全部滿足晒。
呢大筆錢一分一毫都由公帑支付，係納稅人嘅血汗錢，使咗如果有助香港長遠社會同經濟發展，市民唔會反對，但係因為政府弱勢而要「割地賠款」，市民就好難服氣。立法會環境事務委員會委員陳偉業就質疑，如果今次係為咗爭取部分人嘅政治支持，做法就等同利益輸送，值得商榷。公文袋嘅立法會議員亦質疑額外提高賠償嘅原因。
政府一次又一次花錢收買反對聲音，雖然可以少啲噪音，但就會引嚟更多納稅人不滿。而且，政府向紀律部隊屈服，輸咗管治威信；紀律部隊靠嚇爭薪，輸咗公義形象，最弊嘅仲係佢哋輸晒市民嘅心。