教育局局長孫明揚太太鍾小芬自組咗一個名太美食會，名為「心連心」，每個禮拜相約十位名太捐窿捐罅歎盡香港美食，尋日佢哋就約咗喺金鐘港麗酒店八樓嘅意大利餐廳Nicholini's「意寧谷」開餐。呢班名太有成十一個咁多，包括「精英大師」馬主施雅治太太、前警務處副處長黃燦光夫人、恒和珠寶陳聖澤太太，同東華前主席余嘯天太太等。
孫太為保障私隱，包咗間掛有金葉子吊燈同威尼斯風情畫嘅大房食飯。孫太點咗招牌雜錦頭盤同海鮮意大利飯，施太就點咗墨魚汁麵，亦有人指定要食招牌菜燒香草羊架伴芥末同意大利酒汁配玉米粥。埋單計數，每人盛惠約三百五十蚊，不過「心連心」有個規矩，就係出席名太輪流請食飯，今餐就由余嘯天太太埋單。
Nicholini's兩次奪得意大利以外最好嘅意菜餐廳大獎，孫太話，呢度係好味，不過唔係佢嘅至愛，上環著名法國餐廳Bonheur先至係佢首選喎。