施政報告宣布咗活化工廈嘅措施後，好多人都批評呢個措施會令工廈租金飛升，質疑政府只顧商界利益。發展局局長林鄭月娥尋日出席立法會時，大施拖人落水妙計，再三鳴謝九龍東嘅立法會議員「橄欖」陳鑑林，話活化工廈嘅概念係嚟自佢提議嘅優化工廈，呢個鳴謝擺明要對方幫手孭埋政治風險，林鄭呢招真係好高明噃。
林鄭尋日喺立法會介紹活化工廈措施，致詞時講明個建議係採納橄欖嘅意見，佢講嘅時候仲特登望吓議員席，見橄欖未到，晏啲再重提一次，官員咁隆而重之「交代版權」真係好少見。
呢招雖然畀足面橄欖，但對林鄭嚟講亦有好處，事關活化工廈啱啱公布已引嚟爭議，遲吓啲工廈慢慢購併同裝修時，可能出現唔少利益問題，到時政府捱鬧，佢哋都可以抬出呢個建議係得到立法會一個主要政黨議員倡議做擋箭牌，爭取支持都容易啲吖。記得林鄭早前出席講座時先話過，推行重要政策時最緊要做多啲諮詢，咁樣等於拖多啲人落水，好多問題亦可以迎刃而解，估唔到咁快就真人示範。