佗累會議兩度暫停

尋日下晝，立法會議程去到村代表選舉條例草案恢復二讀辯論，原本要向立法會發言嘅曾德成竟然唔喺議事廳，搞到主席要尷尷尬尬咁宣布暫停會議。等咗六分鐘之後，曾德成先至急急腳趕到，會議總算可以重開。

點知官員失魂事件一不離二，冇耐又輪到周一鑊缺席，立法會主席無奈之下惟有宣布再度休會，但就忍唔住暗寸兩個局長，話立法會議員喺新一年度好投入工作：「可能官員喺新一年度未習慣議員咁勤力啦！」唔少議員聽到都忍唔住遮住半邊嘴笑。一等五分鐘，周一鑊先姍姍來遲。

事後，曾德成解釋因為遇到交通問題，等又人多，會議進度又比想像中快，加上計錯時間，所以至遲到喎，佢嘅新聞秘書都有幫忙解畫；周一鑊就話，自己過咗去九龍開會，雖然經西隧返港島，但都無奈遲到。

遲到之外，環境局局長邱騰華雖然人在議會，但尋日嘅表現卻好似神不守舍咁，表現得好呆滯，或者慳電膽事件好困擾佢啩。

立法會首次會議就有兩個官一齊遲到，真係唔多吉利！難怪政務司司長唐英年都要即刻企出嚟維持秩序，言明關注事件，仲嗌啲局長日後去立法會開會要預鬆啲時間，因為政府好重視行政、立法關係喎。