小白觀點：警察世家輸送利益？

香港紀律部隊近月頻頻搞兵變，終於嚇到呢個弱雞政府腳仔軟，當然保佢哋大，加人工就加人工啦，真係睇到普羅打工仔眼火爆！認命啦，佢哋好多都佗鐵㗎，當然嚇得吓人啦，如果有圖書館管理員佗住個釘書機，睇吓公務員事務局局長睬唔睬你？

不過又奇怪喎，施政報告大派慳電膽，就話有利益輸送益親家之嫌，大家可能唔記得煲呔曾出身警察世家，佢細佬仲係警隊前一哥，依家包括警隊在內嘅紀律部隊一律有人工加，聽聞每年要增加七億八千幾萬元額外開支，比派慳電膽一次使兩億幾，真係差天共地，點解又冇人話係「利益輸送」？唔通今次又係因為「公眾利益」，怕警察因為冇得加人工而周圍開槍打人？

網友觀點...X）...

[　King　]

嘩，真唔真呀，扭吓計就加人工，唔怪得個個爭做紀律部隊啦，快啲轉工先。

[　Peter　]

紀律部隊就大晒咩，政府咁縱佢哋，唔怪得依家差人都強姦、消防員都打人啦，政府造成o架。

[　發　叔　]

可能政府驚佢哋有槍，群起造反，香港政府咁冇膽仲唔乜都應承咩。

[　才　記　]

名副其實嘅打工皇帝，妹仔大過主人婆，咁寵法，將來有日香港紀律部隊咪會揸坦克車圍禮賓府囉！

網址：www.sunsiupak.blogspot.com

阿豪觀點：扶貧紓困就牙痛咁聲

大家果然冇估錯，政府經過一輪「考慮」後，最終都係向紀律部隊屈服，八成紀律部隊人員即時變相加薪，政府每年花喺紀律部隊嘅錢，當堂多咗七億幾！

真係講起都激氣，呢個咁嘅特衰政府，叫佢扶吓貧紓吓困，慘過畀人舂兩拳，仲威脅話如果長期推行紓困措施嘅話就要加稅。哦，依家每年大手筆使近八億改善紀律部隊嘅待遇，就眉都唔皺一下，咁算點先？

不過鬼叫你冇得佗炮，冇厘power，邊個會驚你呀？老實講，都預咗畀班紀律部隊任劏（我係指個荷包）o架喇，豪伯我只有一個卑微願望：第時政府唔好再浪費納稅人嘅錢嚟登紀律部隊招聘廣告，反正咁嘅筍工本身都已經爭崩頭啦！

網友觀點...X）...

[　禮義廉　]

有「警察世家」撐場，梗係有得加人工啦，我哋呢班小市民唔恨得咁多o架喇！

[　尖　子　]

呢個政府不嬲都係咁欺善怕惡㗎啦，邊個嘈得大聲啲就有着數……

[　伊藤開司　]

下次政府畀人叫派糖時唔使苦口苦面啦，索性搞大抽獎，中獎市民可獲紀律部隊職位一個，益自己人都心甘情願嘛！

[　苦　仔　]

一個公務員上街，威力等同一百個市民上街。問你服未？

網址：www.lukchiho.blogspot.com