鬼咩，紀律部隊薪高糧準不在話下，郁啲就嗌遊行，一唔高興又話按章工作，連特區政府都買佢哋怕，你話威唔威吖？

呢嗱，前排成班紀律部隊作晒反，訴求五花八門，講到底，其實只不過想逆市嗌加人工之嘛。行政會議尋日終於賣大包通過三份公務員職系架構檢討報告，八成紀律部隊人員變相加人工，警長及其他部隊嘅相若職級，可以多兩個增薪點添，而且全部可追溯至今年四月。

有人工加喎，畀着邊個都Happy啦，紀律部隊評議會表示暫時對政府安排感到滿意，認為唔同職級都受惠，對士氣有鼓舞作用。哦，真係唔講唔知，原來紀律部隊嘅士氣唔係嚟自維護法紀、服務市民，加人工即刻加埋士氣，既然士氣返晒嚟咯，怕且唔使再上街啦。不過納稅人就笑唔出咯，日後紀律部隊嘅開支就勁咯，每年額外增加七億八千幾萬元㗎！

查實明眼人一睇就知，紀律部隊今次擺到明將特區政府逼到埋牆角。城市大學專業學院學術統籌宋立功講得啱，佢話今次事件反映政府弱勢，邊個大聲啲惡啲，政府就聽得清楚啲。難為公務員事務局局長俞宗怡打死唔認，話冇受到任何紀律部隊威逼，亦強調並唔係「派糖」，真係講都冇人信啦。

好明顯，政府喺成件事情上根本就係雙重標準，一面倒偏幫紀律部隊，邊有理會過公眾利益吖？唔係咩？紀律部隊好似寵壞咗嘅二世祖咁身在福中不知福，成日想要多啲着數，撞正呢個大細超嘅家長，唔理二世祖嘅要求係幾唔合理，都係千依百順，要乜有乜，如果開到口，成間糖果廠畀晒佢哋都得。

正所謂同人唔同命，小市民只不過希望政府派一粒糖吊住命仔，都唔係好過分啫，嘿，點知曾蔭權一聽到個「錢」字，即刻黑起塊面，死撐話有穩定嘅經濟發展至可以解決就業同埋貧窮問題，如果要長期派糖推出紓困措施，就恐嚇話要加稅。叮！官民待遇竟然有如此天壤之別，嗱，呢啲咪就係「親疏有別」囉。

話時話，依家畀紀律部隊得逞，唔好以為咁就告一段落呀。事實上，其他紀律部隊依然眼紅警隊嘅待遇硬係高人一等，佢哋亦都表明會繼續向當局爭取同工同酬。至於其他公務員職系，正所謂「不患寡而患不均」，仲唔趁呢個時機博懵搵着數就有鬼咯。

講到底，最慘就係小市民，施政報告扶貧紓困交白卷，糖都冇一粒，得嗰張糖衣慳電膽現金券，又搞到一鑊泡。家陣每年仲要白白畀紀律部隊七億幾額外開支，政府高官最鍾意問嘅一個問題就係「錢從何來」。仲使講，咪又係來自納稅人嘅血汗錢囉。認命啦，鬼叫你唔係自己友咩，唔恨得咁多o架嘞。