肥亨此語到底係認為煲呔曾彎腰認錯都難息民怨，定係覺得時機已過，就要當事人自己體會嘞。退出官場嘅肥亨明顯唔想講慳電膽事件，惟有用句「不在其位，不謀其政」嚟擋駕。

唔敢包買金一定賺

辭官後勁減十幾磅嘅肥亨尋日接受《志雲飯局》訪問，地點揀喺情調十足嘅淺水灣酒店，雖然美食當前，但肥亨為免血壓上升，惟有得個睇字唔食得。政事唔想講，經濟又點呢？肥亨即刻發揮前財金高官本色，話依家全世界都擔心通脹升溫，所以黃金成為資金避難所，但佢話唔敢寫包單買金一定賺，總之分散投資最實際，千祈咪獨沽一味買一樣。

恒基四叔李兆基早前貼中澳元會勁升，果然言中，肥亨就謙稱唔識睇外匯，話影響外匯波動嘅因素太多，就算今日買得準，未必代表六個月後仍然適用喎。