本文重點
律師會早排動作多多，會長王桂壎尋日同傳媒會面，冇再講爭取法援等嚴肅課題，反而大講佢喺唔同階段認識嘅明星。唔講唔知，佢中學時同藝人曾志偉踢過波；讀大學做兼職時，又教過DoDo鄭裕玲。
做過DoDo阿Sir
王桂壎中學時就讀聖芳濟，佢接觸最多嘅明星係曾志偉，事關志偉同佢係中學校友兼波友，經常落場較量球技，可惜長大後各有各忙，好少聯絡。至於DoDo又同佢有乜淵源呢？話說王桂壎讀中大歷史及語文學系時，曾喺某日校兼職教英國文學同經濟，咁啱得咁蹺，DoDo就係佢學生。佢話當年嘅DoDo恨做明星恨到發晒燒，經常走堂去試鏡，估唔到呢位學生妹，今日已搖身變成獨當一面嘅金牌司儀。
佢間中學猛人如雲，李小龍就曾以師兄身份返母校做校慶頒獎嘉賓，同學即興叫李小龍除衫影相，結果李小龍脫去上衫展示六舊腹肌，可惜王桂壎當日不在場。另一個猛人師兄許冠文就高佢四屆，佢記得許冠文當年讀書時已盡顯搞笑本色。