施政報告公布後，煲呔曾就被踢爆向親家輸送利益，仲累埋特首辦、環境局等一齊受靶。其實煲呔曾入咗農曆九月行衰運早有人知，我哋早喺鼠年農曆年三十晚，邀請術數師傅預測一眾高官嘅牛年運程，當時香港術數家協會術數師傅楊子東已經測到煲呔曾好黑仔，預計仲要黑到出年立春先會轉運。
楊師傅計過煲呔曾嘅出生年月日，算到佢最忌火、土，而九月係「甲戍月」，「戍」係「火庫」，己丑年五行立陰係「霹靂火」，煲呔曾嘅八字簡直沖到七彩，有醜聞一啲都唔出奇。有人會問，呢個月十八號至係農曆九月初一喎？楊師傅話，呢個月八號「寒露」已算開始踏入農曆九月，無花無假。
呢股衰運往後點發展呢？楊師傅話，農曆十月「乙亥月」，可能會有人幫煲呔曾孭鑊頂一頂，叫做化解咗少少，但呢股衰運會繼續纏身，一直衰到庚寅年，即到下年新曆二月四號立春之時，股黑氣至會消散。
楊師傅算高官運程好準，但算牛年股市同樓市就另一回事，佢話本港中小型住宅同豪宅樓價會大幅下挫，股市會低見七千五百點，但呢大半年嘅股樓情況就完全背馳。