行會尋日散會後，冇份出席「曾朋友」飯局嘅行會召集人梁振英同成員張炳良，主動就慳電膽事件幫煲呔曾向傳媒解畫，反而有去飯局嘅梁智鴻同楊敏德就冇咁做，開完會就閃。記者追上去問楊敏德係咪有去「曾朋友」飯局，佢居然話自己「冇去」；但明明影到你喺現場喎？佢就聲稱當晚只係去「一般飯局」；乜餐飯唔係慶祝煲呔曾結婚四十周年嘅咩？佢竟然話：「我都唔知！」

不過，有與會者就實牙實齒咁話楊敏德當晚肯定在場，仲噏得出佢同城中一位超級富豪二代同枱，當事人話當晚係一般飯局，明顯係捉字蝨。