有保安員執勤受傷後，立法會秘書長吳文華（Pauline）都幾煩，尋日佢特別搵咗保安員開會，一方面聽佢哋嘅心聲，一方面為佢哋打打氣。保安員向佢反映，話佢哋一方面要執行主席命令，另一方面又要以禮對待民意代表，遇着一啲理性嘅議員大家就唔使肢體衝突啫，但長毛就唔容易處理，其實過去都有保安員擦傷過，只係冇出聲。開完會後，Pauline直言大受感動，為免再有保安員受傷，佢諗住盡快搵長毛傾偈，希望「動之以情」。

建築署未能解決難題

秘書處亦諗咗好多改善措施，譬如喺立會大樓嘅走廊牆壁加裝軟墊，好似BB房咁，避免啲保安員執行主席命令時再受傷，又或者將啲方枱角磨為圓角，但建築署研究後都有問題，結果都係未解決。

好彩秘書長早前已增聘人手，下個月就有多三個保安員返工，人手充裕。Pauline仲話，會向行政管理委員會反映，希望將來立法會新大樓會留多啲空間，最好可以將議事廳整到BB房咁安全就好嘞。呢個雖然係良好願望，但納稅人一定唔同意，事關議員嘅工作係審議法例，唔係喺BB房玩，更加冇特權隨便整傷他人，事後仲要花公帑嚟補鑊，咁嘅議員實在太過分！