小白觀點：曙光論累打工仔做傻事

失業率終於跌喇，跌幾多？零點一個百分點囉！勞工及福利局局長張建宗即刻鬆毛鬆翼，好似啲二打六議員咁，紅綠燈閃慢兩秒又話係佢功勞，間唔中又話成功爭取荔枝團團餐多一碟餸。

不過小白老弟就唔係好信啲數據嘞，家陣樓市同股市暢旺，失業數字應該升至啱㗎！你知啦，好多人信兩條盲毛財金官員講嗰套經濟曙光論，兜口兜面掟封辭職信畀老闆，諗住喺股海中翻幾番，點知一個大浪打埋嚟，佢哋先知道，原來嗰條唔係曙光，而係「回光返照」。到嗰時，咪當張建宗係「送工觀音」咁拜囉，日日去佢官邸門口借份十億月薪嘅工，相信張大仙一定唔會托手(月爭)嘅。

網友觀點......

Eric

班人睇見個數字跌咗少少就開心到飛上天，仲有千千萬萬失業嘅人捱緊苦呀！

陳仔

失業率跌？叫張建宗幫我搵份工，睇吓係咪真係咁易吖。

小肥

班局長坐喺冷氣房腳un un，成日話基建創造就業，你睇依家一項工程都唔見呀，唉！

Frank

數字得嗰零點一個百分點就開心成咁，你話班人係咪得閒冇嘢做，咬住雞碎當成功吖！

網址：www.sunsiupak.blogspot.com

阿豪觀點：勞工之友唔照失業人口

勞福局局長張建宗興高采烈咁出嚟話畀大家聽，本港就業市場已經趨向穩定，但係原來失業率只係微跌咗百分之零點一咁大把咋！

張局長對於咁小成績就沾沾自喜，香港人都咪話唔驚。豪伯曾經睇過某位區議員掛嘅街板，上面大大隻字寫住「成功爭取此綠公仔燈延長兩秒」，嘩！真係豐功偉績，街坊真係多得你唔少囉！老實講，大家覺唔覺張局長「成功爭取失業率下降零點一個百分點」，同「綠公仔燈」街板好相似呢？

喂！咪住，乜張局長唔係「勞工之友」咩？點解唔幫吓啲失業人士早日搵到工？可能失業人士唔算係「勞工」，所以唔喺局長朋友之列啩……

網友觀點......

匿名

嘩，失業率再低啲，張建宗咪特首都有得佢做？

燈膽權

那0.1百分點，是來自金融業的吧，低收入人士又是得個捱字。

Johnson Lo

壓低失業率根本就係政府嘅本分，唔好好似出嚟邀功咁啦，唔該！！

廖尚恆

依家失業率已經回落0.1%，咁第時落實六大優勢產業，咪可以達成全民就業嘅希望？Yeah！

網址：www.lukchiho.blogspot.com