我就信「群策創新天」多啲嘞，大家一齊度吓「橋」，好多嘢就可以瞞天過海；嘻，即使「群策」一時漏口變「群賊」，只要搵到「梁山泊」一類的地盤，一樣可以聚義闖一番新天地也！范仲淹之所以唔可信，因為佢唔夠務實，一味吹水！喂！你話等天下人都快樂了，你才來快樂，筆者相信你一世都咪使旨意快樂，皆因天下總有人不快樂。唔好話天下咁大，一個家庭都難，有得四、五個成員，要是個個快樂你才快樂，相信你日日都面如苦瓜！

鄧小平之所以了不起，皆因佢都係話「讓一部分人先富起來」，事實證明佢做到，睇吓內地啲大款搞到香港豪宅呎價六、七萬元就知喇！專業人士如醫生、律師都呻買唔起樓，煲呔曾卻說：買遠啲啦！四千蚊呎嘅大把！

如今，我們已步入「有咁耐風流有咁耐折墮」的年代，香港人買內地平價樓，反而內地有錢人買香港豪宅！遲啲香港最靚嘅地段，全部落在內地同胞手上，不懂普通話者不得進入！港燦，你都有今日！

美國大導演大衞連治曾說：「創意就像魚。如果你想捉小魚，留在淺水即可。但若想捉大魚，就得潛入深淵。」香港只會愈來愈多窮人，筆者打算北上創業，祈望有天南下掃豪宅。