其實，河上鄉非法傾倒泥頭問題已經擾攘咗好幾個月，有關部門嘅高官亦去「視察」過，仲話要嚴肅處理，回復原貌添，可惜完全得個講字。冇錯，規劃署、環保署甚至警方，日日循例派人去巡，但一樣日日有人非法傾倒泥頭，而且仲愈嚟愈猖獗添，你話係咪吹脹吖！

叮！政府畀人明剃眼眉，環保署居然仲話同規劃署去睇過現場，未發現有進一步填土喎。唔係啩？村民明明拍攝到有車喺現場傾倒泥頭，唔通係幻覺？

道高一尺，魔高一丈，執法人員大鑼大鼓去巡視，發現到問題至出奇，違規者再蠢，都唔會白癡到喺執法人員面前傾倒泥頭喇。有心執法嘅，大把方法喇，依家好似同非法傾倒泥頭嘅人輪流返工咁，你朝九晚五，佢就晚五朝九，都唔知係執法定縱容，唔怪得違規者當政府透明啦。

正如立法會議員話齋，非法傾倒泥頭係公然挑戰法律，不過，最大嘅問題都係喺政府身上。環境局副局長潘潔回應投訴嗰陣，一味顧左右而言他，話雖然肯定有違例發展，但仲要研究傾倒嘅係咪建築廢料喎。

叮！咁大片農地畀人變咗堆填區，環境被嚴重破壞，既然證實係違例，就應該即刻採取行動制止啦，研究來研究去，最後咪又係不了了之。處理非法傾倒泥頭咁簡單嘅事，一拖幾個月，居然乜都做唔到，你話仲點旨意政府為市民做啲實際嘢吖。

唔怪得搞到旺角行人專用區雞飛狗走嘅鏹水彈事件，到依家仲破唔到案喇。警方開頭扮晒叉燒，實牙實齒話要將狂徒繩之於法，煲呔曾仲去現場打個白鴿轉做騷添。結果大家有眼睇，鏹水彈一個接一個，擲彈狂徒喺邊，警方仲矇查查。仲有吖，嗰單「藝人床照案」，查咗咁耐，「奇拿」一樣連影都未見。

最搞笑嘅係，當局口口聲聲保護知識產權，但有傳媒舉報獨家相片畀人盜用，有晒真憑實據，人贓並獲，執法部門竟然仲詐傻扮懵，無動於衷，任由侵權者逍遙法外。

叮佢個鎯鎯！成班政府官員懶得就懶，卸得就卸，拖得就拖，有法唔執，執法唔嚴，香港就嚟變成無法無天嘅九反之地，仲講乜嘢群策創新天吖。