小白觀點：唔扮老外冇運行

本港單車手黃金寶喺山東濟南備戰全運會時「蒙難」，入場時被場地保安推落地不特止，有香港體育學院人員更畀人打傷添。黃金寶畀國家領導人形容為「比黃金還珍貴的寶貝」，喺山東竟然變爛銅，真係豈有此理！

近年內地黑哨就梗㗎喇，曾經試過有球員拔足狂奔百米追打球證，追波都冇跑得咁快，因住有內地單車好手以腳代單車，隨時追住阿寶打都攞亞軍呀！

不過當地政府都算唔話得，立即將場地保安撤換，搵武警叔叔頂上，嘿，到時何止運動員呀，連採訪嘅記者都打埋一份！黃金寶想奪金？睇嚟要戴個金色假髮扮老外兼組織隊「功夫單車」至有運行。

網友觀點...X）...

[　傻　頭　]

黃金寶今次真係冇晒face，嗰個保安唔識寶。

[　琪　妹　]

將嗰個保安革走啦，連黃金寶都唔識，何況其他運動員？好人當賊辦。

[　石　仔　]

仲出手打人，幾失禮，啱啱至辦完奧運，揚威國際，依家就出手打運動員，影衰晒，露晒底。

[　永遠支持你　]

黃金寶！加油呀！香港人嘅驕傲，唔好衰畀人睇呀！

網址：www.sunsiupak.blogspot.com

阿豪觀點：內地保安劣迹斑斑

香港單車健將黃金寶喺山東為全運會訓練期間，慘遭練習場地嘅保安推跌落地。想當年黃金寶喺香港啱啱踩單車時，乜嘢支援都冇，連比賽用單車都要問人借，點知依家返到內地又畀人恰……依家換咗武警守個場地都好嘅，不過阿寶記得唔好指手畫腳喎，你知班武警幾惡㗎啦！

講起內地保安，又真係劣迹斑斑，推人落地算係小事，試過有商場保安捉到個女小偷，竟然惡到帶返辦公室，要求對方除衫畀佢「檢查」清楚，令人髮指。不過論惡，點都唔及城管！佢哋內部有本叫《城管執法操作實務》嘅「武功秘笈」，教導城管人員點樣喺執法時做到對方「臉上不見血，身上不見傷，周圍不見人」，問你怕未？

網友觀點...X）...

[　匿　名　]

內地公安除咗識打人之外，阿豪寫得好清楚，仲識推跌人哋，正經嘢就唔識做。

[　廢雷曼兄弟　]

踩國產鳳凰牌單車，待遇會唔會好啲呢？

[　豬標精　]

係咪以為黃金寶參加咗全運會武術比賽呀？

[　joey　]

真係過分！如果打傷咗黃金寶而影響咗佢嘅表現，由邊個負責？？而且又一次證明內地保安員唔文明。

網址：www.lukchiho.blogspot.com