本文重點
理大前校長潘宗光尋日返理大攞榮譽博士學位，見佢瘦咗好多喎！眾所周知，佢醉心佛學，原來早前佢同一眾志同道合嘅朋友，去咗河北避暑勝地北戴河共修。所謂共修，其實包括打坐、冥想等，目的為減少自己嘅執着、物欲、語言溝通，甚至唔食嘢，齋飲水。起初佢點都唔肯講幾多日冇食嘢，話費事嚇親人，後來終於透露有四、五日唔食嘢，佢話修行期間身體消耗少，斷食幾耐可因人而異喎！
退休後唔做受薪工作
退休後，佢做咗嘉華國際同合和公路基建嘅非執行董事。佢兩個職位都係朋友叫到，惟有義不容辭去做，好似嘉華國際主席呂志和喺佢退休前一個月，捐咗三千萬畀理大，呂志和想搵佢做非執董，好難推；合和實業胡應湘同理大好有淵源，亦冇得推，總之佢嘅宗旨就係唔做受薪工作啦！