全國人大常委范徐麗泰尋日返去佢服務過十六年嘅理工大學，接受榮譽社會科學博士。事後問起煲呔曾單嘢，范太話：「初初我睇報道嘅時候，我都覺得有啲驚訝。」不過易地而處、諗深一層後，佢覺得「其實我啲姻親係做緊啲乜嘢事，我都唔係好清楚」，加上申報制度只係要求申報自己本人同直系親屬嘅利益，所以就算佢諗得到亦未必會申報。

話雖如此，但范太亦認為「其實我哋平常人唔會諗到親戚嗰度，咁當然我哋明白行政長官唔係平常人」。至於煲呔應唔應該拿拿聲出嚟道歉，范太堅持佢不便評論，事關佢嘅身份係全國人大常委，無謂引起不必要嘅誤會啦！

大家聽到呢幾句說話，有冇覺得有種綿裏針嘅感覺呢？睇嚟范太係要拮醒煲呔曾，既然做得特首，總唔能夠以一般人嘅角度去睇問題，所以今次煲呔曾唔醒爬真係冇得醫！