特區政府授勳向來被視為分餅仔遊戲，做得好分件餅冇乜所謂，但好似食物及衞生局局長周一嶽呢啲撞板多過食飯嘅庸官，任內頻頻發生醫療事故，令唔少人枉送性命，最終竟然獲頒金紫荊星章，認真離譜！煲呔曾日前被揭發推銷慳電膽涉嫌益親家醜聞，獲頒大紫荊勳章嘅政務司司長唐唐見到記者就雞咁腳走人，其他多名獲授勳嘅高官亦封口唔敢講嘢，變晒鵪鶉。
唯一係周一鑊敢企埋記者區講嘢，佢話深感榮幸，又感謝市民對當局政策嘅支持，真係唔知「醜」字點寫。問到政策問題，佢話呢個場合唔係太適合講，有乜嘢等禮拜三喺立法會再傾喎，真係唔知佢何德何能攞金紫荊！
