煲呔曾被揭發親家係「慳電膽大王」，但佢喺行會討論慳電膽現金券建議時，冇主動避席或者申報利益，有隱瞞利益明益親家之嫌。大家聽到呢單醜聞後，不期然諗起六年前發生嘅前財政司司長梁錦松偷步買車事件。其實除咗兩件事極其相似外，仲有一個相同之處，就係當事人嘅近身助手都係譚志源。有官場中人就笑稱譚志源變咗老細剋星，應該幫自己改個花名叫做「黑仔源」。
當年阿松自爆時任佢新聞秘書嘅譚志源，喺事件曝光前曾坐過佢架新車，但都冇提佢申報。而喺佢做特首辦主任之前，講過買車事件令佢「經一事、長一智」，以後會小心處理同類事件，點解今次又冇提醒老細申報呢？政府消息就話，有參與今次決策嘅各級官員，事前都唔知煲呔曾親家原來做慳電膽，自然冇人識得提佢。如果呢個係事實，譚志源就真係黑過墨汁囉！
堪輿學家麥玲玲話，做下屬嘅成日累老細孭鑊，大部分係五行或生肖唔夾，亦有少數人天生剋老細；亦有啲情況係個老細嘅「奴僕宮」生得唔好，搵乜人做下屬都係「二五仔」或「陀衰家」，咁就唔關人哋事嘞。