禮賓府尋日舉行授勳儀式，當中見到獲頒大紫荊勳章嘅金管局前總裁任志剛。任總風采依然，獲頒大紫荊勳章後不斷同傳媒揮手，同太太及一對子女任影唔嬲，又走到記者區回答問題，任太仲笑笑口透露稍後會去日本旅行添！
獲頒金紫荊星章嘅商務及經濟發展局前局長馬時亨，由於兩個囡囡各有各忙，所以只係得太太王培琪陪佢出席。肥亨話獲授勳感到好光榮，代表過去六年為官期間市民對佢嘅支持。
同樣獲頒金紫荊星章嘅玩具大王蔡志明，佢大女加敏嘅愛駒「靚到爆」喺禮拜三夜馬奪冠，尋日蔡老闆獲授勳後，佢細女加怡嘅愛駒「萬能駒」又贏馬，贏到三十五萬獎金，一個禮拜內三喜臨門！
蔡老闆同太太、大女加敏同囝囝加讚一齊出席授勳儀式，佢仲笑住話自己係「沙田第一金」，即係首個沙田居民獲金紫荊殊榮，係對佢過去嘅公益事務最大嘅肯定，仲話夜晚一家人會去沙田食飯慶祝。