畀市民鬧爆，但煲呔曾扮聾耳陳，乜都聽唔到咁款，尋日仲喺電台節目《香港家書》度話，要推動經濟唔可以再好似六、七十年代咁靠廉價生產成本去競爭、做世界工廠，今後嘅撒手鐧只有「知識」同「創新」，簡單嚟講係靠「食腦」，仲玩潮語話經濟要過關「升呢」，要發展高增值同知識型嘅產業。

要創新，唔係靠把口就得，講句「升呢」就真係「升呢」咩！再講，呢句潮語興咗好幾年，佢依家先識講，已經慢咗好多拍啦！咪話創新，搵啲新意都冇，似執人口水尾多啲。

煲呔曾講到食腦，有啲立法會議員就好有意見。正如有勞工界背景嘅李卓人就話，煲呔曾講食腦簡直係諷刺，單單睇佢推慳電膽搞到涉嫌利益輸送畀親家，好明顯就係冇腦，又或者個腦唔知去咗邊啦。

走精面「升呢」典範

講到「升呢」就仲衰，李卓人話喺經濟好嘅時候，基層市民都受惠唔到經濟成果，依家先話邁向復甦，仲有百幾萬貧窮人口，咁煲呔曾係咪應該幫班基層「升呢」先呢？佢仲加多腳話煲呔曾講過單靠金融業，養活唔到七百多萬人，其實勞工界以前同佢講過好多次，佢唔聽啫，依家為咗撐自己搞多元經濟，就轉軚推六大產業，認真樣衰。

之不過，另一名議員「大舊」陳偉業就唔係咁睇，佢話冇心就冇腦，有心就有腦，煲呔曾搞單慳電膽涉嫌益親家嘅嘢出嚟，有心嘅咪有腦囉，仲好食腦添！

至於香港人「升呢」，大舊直指煲呔曾簡直係典範呀！咪以為喺度抬舉煲呔曾，跟住大舊話煲呔曾識把握時間上位，跟住細佬做完警隊一哥就下海從商，佢家族成員個個都升晒呢啦！真係夠晒腰心腰肺呀！