施政報告話鼓勵業主重建或改裝舊式工業大廈，提出活化逾千幢工廈嘅四項措施。發展局局長林鄭月娥尋日話，呢啲措施好大膽，而且「快、準、狠」，工廈凡係符合條件嘅就可以改裝轉型，唔使因為繳付豁免費而經過繁複嘅審批程序。

經濟轉型咁多年都搞唔掂，工業幾乎全部北移，工廈早已十室九空。咁多工廈丟空，港府如果有心嘅，早就應該做嘢，使乜等到依家吖。

港府呢次扮到話做就去做咁，明年四月一日生效，認真夠快，改裝工廈豁免費全部唔收，認真夠狠。不過啲措施全部係急就章，唔理好醜，但求就手，冇晒準繩。「地盡其用」未必做到，仲可能愈搞愈亂，收唔到科。

呢嗱，施政報告重點係六大產業，人人都以為活化之後嘅工廈，梗係用嚟配合呢啲產業啦。點知林鄭月娥一口否認，話限制喺發展六大產業，執行上會有困難。

叮！原來活化工廈用途無限。照林太所講，除咗經濟活動，仲可以改做宗教聚會、娛樂、康體、福利等用途，如果做娛樂同康體，仲唔使經城規會審批添，咪幾乎做乜都得？如果有關部門好似平時咁疏於監管，有人將工廈做埋住家都冇人理，容乜易亂晒大龍o架？

措施明年初就實施，到依家樣樣嘢都仲係唔清唔楚靠斷估，做呢樣又得，嗰樣亦OK，到時好難避免畀人濫用。據講有地產商已經捷足先登，開始大規模收購舊式工廈。假如當局繼續翹埋手條條Fing，唔及早清晰釐定活化工廈嘅用途，到時只會亂上加亂，製造新矛盾、新問題。

有立法會議員話，工廈改裝免交一半豁免費嚟吸引業主，已經足夠有餘，全部免交會嚴重影響政府收入。

話時話，港府呢次咁大手筆，又冇周詳規劃，仲留低唔少漏洞，遲早會出事，根本就係慷納稅人之慨嚟博掌聲，完全係搵笨。

至弊呢啲措施添煩添亂最直接嘅後果，就係令租金水漲船高，原來租開工廈嘅藝術團體同創意產業者焗住捱貴租，捱唔住嘅，惟有執笠。當局口口聲聲支持創意產業，結果適得其反，變咗扼殺呢啲產業，咪盞攞嚟搞。

林鄭月娥催谷活化工廈計劃，心口掛個「勇」字，跳上台耍幾招花拳繡腿，功底認真麻麻，都唔知想打乜。「好打得」塊招牌，睇怕換成「盲拳師姐」啱佢多啲。叮！