曾蔭權嗰份施政報告出爐，又有人話施政報告冇料到，插到反艇。小白老弟真係睇唔過眼，大家唔好咁橫蠻無理得唔得？有料到就唔叫施政報告啦！你估煲呔曾好想寫報告咩，好想出嚟畀人插咩，佢夠想飛去日本睇紅葉，佢夠想繼續玩潛水，大家將就一下啦！

希望下任特首唔好咁笨嘞，反正施政內容咁高大空，不着邊際，好多嘢聽過就算，咁鬼玄妙，不如名正言順改名做《施政流年運程報告》好過啦！到時唔使花公帑印嚟免費派，每本定價一百蚊，你知啦，大把師奶讀者連封面係乜水都唔理，總之有「運程」兩個字就爭住掃貨，到時庫房豬籠入水，隨時夠錢請多幾個副局長呀！

網友觀點...X）...

[　阿華　]唓！年年份施政報告都係冇料到㗎啦，當吹水秘笈聽吓就算lu。

[　吹水明　]班官嘅吹水嘢都好信嘅，加料反而我哋仲慘，以佢哋嘅能力，好多嘢唔做好過做，你睇母語教學就知啦，成鑊粥咁。

[　Kenneth　]份施政報告都聽到悶晒，連維園阿伯都鬧到唔想鬧。

[　Gary Lau　]今年金融海嘯、豬流感一齊來，經濟環境咁差，權權份施政報告係咁上下㗎啦，如果佢叻少少都唔會做特首啦！

網址：www.sunsiupak.blogspot.com

阿豪觀點 原來好有教育意義

各界狠批煲呔曾份施政報告「冇料到」，其實大家只要仔細少少睇，會發現原來份報告好有教育意義！

1.英語課：究竟Bow Tie keep抑或係Bow Tie keeps啱呢，原來要睇吓當時語境，究竟係指令句定係陳述句，至於兩者有咩分別，有興趣可以查吓小學英文教科書。

2.中文課：話煲呔曾係語文大師，相信冇人會反對。之前已經有「康長」（冗長之誤讀），今次又自創四字詞「歸本實份」，（斷估同賭錢有關？）青少年聽得多佢啲反面教材，語文水平大升可期。

3.德育課：冇咁大個頭唔好戴咁大頂帽，冇錢咪住偏遠啲囉，知冇？

網友觀點...X）...

[　真卜勤　]豪哥好嘢，估到曾特首用意。施政報告真正想講保育，悶出個鳥來。

[　偽黎安　]港人都係自求多福罷啦，咪下下旨意政府派糖救濟。

[　Johnson Lo　]嘩，唔係啩？施政報告咁悶都睇？我寧願睇《美×廚房》好過啦，起碼夠養眼，冇咁易瞌着呀！

[　Bo吠　]根據煲呔曾嘅邏輯，你班人唔好再喺度嫌三嫌四，想要好嘅施政質素，搬遠啲去外國住咪得囉！

網址：www.lukchiho.blogspot.com