前財政司司長梁錦松依家係美國百仕通集團嘅高級董事總經理，又係中國藍星副董事長，仲執掌埋國際小母牛計劃，早前天津南開大學仲請佢做客座教授，佢前日北上，既為南開嘅師生主持《金融海嘯一周年反思》講座，仲係正式接受聘書。
阿松話咁耐以嚟大大話話經歷過九次金融危機，總結出「金融產品模型複雜」、「借債過多」同「投資人、交易員經驗不足」嘅金融海嘯成因。佢又睇好國家經濟發展，話如果唔打仗，未來二三十年要保持咁高嘅增長速度都唔係難事。
但嚟捧場嘅師生似乎唔止睇中阿松嘅財金經驗，仲好想見吓佢另一半：前「跳水王后」伏明霞。講座嘅另一個主持就同阿松講，叫佢下次有機會帶埋太太嚟同大家見面，即時全場拍掌支持，但錫老婆嘅阿松就笑笑口唔答。