象哥曾經睇過一啲營養雜誌，提到肉類可以促進新陳代謝，年輕力壯嘅人食咗會強壯啲，但年紀大食得肉多就加快衰老，好似佢咁嘅年紀都有番咁上下，飲食好應該節制吓，盡量少肉多菜。因為怕加快衰老，佢由以前八成肉同兩成菜嘅比例，改為菜同肉各佔一半，無奈工作應酬太多，一年冇幾多日在家食飯，少不免又要食肉，惟有食到一半就鬆人。雖然佢飲食少肉多菜，但秋風起又令佢想起膽固醇勁高嘅大閘蟹，但大家唔使為佢嘅健康擔心，因為佢之前講過唔怕心臟病，只係最怕荷包「乾」（肝）硬化。